Schwyzer Maschgradä Ladä

Hallo zämä

Mi Namä isch Bruno Föhn und ich bi in Seebä ufgwachsä.
Seebä oder allgemein de Talchessel Schwyz bezeichnä ich ganz klar als mini Heimat.

Mini gröschti Liidäschaft gilt dä Fasnacht.

Wahrschinlich isch miär das dur min Vater, wo 10 Jahr im Vorstand

vodä Fasnachtsgsellschaft Rickäbach gsi isch, id Wiägä gleid wordä.
Bereits i jungä Jahrä hani mini Füäss chum chönnä still ha, wenn ich dä Schwyzer Narrätanz ghört ha und bi de Maschgeradä

nachä gsprungä für diä beschtä Orangä und Süässigkeitä.

Nid nur s Maschgeradälaufä, nei au d Tradition vode Guggemusig het mich es Ziitli begleitet.
Bidä Guggemusig Fronalp-Chessler ha ich mit Härzbluät am Bass mitgspielt.
Hüt organisiärä ich diä inzwüschä guet bekannti und beliäbti Sousaphonwanderig.

Au uswärtigi Fasnachtsbrüch und Traditionä interessieret mich sehr und ich ha idä Zwüscheziit es grosses Wüssä rund um d Fasnacht im In- und Usland chönnä ufbuuä, was mich richtig stolz macht.

Doch zrug zu minärä gliäbtä Schwyzer Fasnacht.
Vom afänglichä Orangäjagä, hets mich irgendwenn denn selber is Gwändli zogä.
Und ja, sobald ich s Gwändli und d Maschgerä vode Schwyzer Fasnacht aha, fühl ich mich wohl

und so zsägä dehei oder eifach nur komplett.
Das Bruchtuum isch für mich Liidäschaft pur und es isch miär es grosses Aliegä, dass diä Tradition gläbt

und no lang wiitergfüährt wird.
Also ha ich mis bereits scho sehr fundiertä Wüssä mit absolutä Fasnachtsexpertä, wie
z.B. Walter Nideröst, Richard Büeler, Hans Steinegger, wiiter vertieft und ergänzt.

Bim Herstellä und Beschaffä vo Fasnachtsutensiliä isch miär immer wieder ufgfallä, dass das ä sehr ziitintensivi

und teils müähsami Arbet isch.
Also ha ich am 05. Jänner 2018 Nägel mit Köpf gmacht und min eigenä Fasnachtsshop (https://foehnlederwarenstoffe.ch/) gründet.
Es isch miär wichtig, dass Originalfasnachtsfigurä mit qualitativ hochstehendä Produkt chönd härgstellt wärdä

und dur das ihres traditionellä Usgseh no lang chönd biibhaltä.
Us dem Grund hend alli Fasnächtler (oder diä wos no wend wärdä) d Möglichkeit bi miär sämtlichi Produkt

für Originalfigurä zbstellä.
Gärn lieferä ich üch diä Bstelligä direkt zu üch hei und gibä üch, wenn gwünscht, au gärn Tipps oder Infos

zu dem bsunderä Bruchtuum mit ufä Wäg.
Zudem chönd iär bi miär Rollägürt für Schwyzer, Brunner, Steiner und Sattler Blätz la afertigä, oder eifach alli Teili für äs Blätz Gwändli la stanzä oder no Vieles meh…

Ich chönt hiä no ewig so wiiterschribä und üch Gschichtä rund um d Fasnacht wiitrgä…
Aber am Beschtä macheder üch selber es Bild vo minä Agebot und stöberet mal mini Homepage durä.
Bi Fragä döffet iär üch ungeniert bi miär mäldä, ich bi miär sicher, dass miär e Lösig zu üchnä «Fasnachtsproblem» i Sinn chund.

Ich freuä mich über villi Aregigä, Gspräch und natürlich baldigi Ufträg vo üch.

Fasnächtlichi Grüäss
üchä Bruno